Grianghrafadóireacht dhaite
Atáirgeadh fótagrafach dathanna ó chlaonchló a thaifeadann na comhchodanna dearga, glasa is gorma den radharc ina gceann is ina gceann. Cruthaítear dearbhchló trí shuimiú (na híomhánna comhfhreagracha a theilgean, forluite ina ndathanna cuí) nó dealú (clóbhuailte i ndathanna comhlántacha, cian, maigeanta is buí).
Bhí ceamaraí a nocht 3 phláta ag an am céanna, trí scagairí dathanna is priosmaí léas-scoilte nó scátháin, á ndéanamh ó na 1880idí, agus clónna dealaithe tríd an bpróiseas carbro nó lí-aistriú. Ba chéim mhór ar aghaidh an tríphaca iomlánaithe, a rinne taifeadadh ar 3 chiseal fótagrafach difriúil ar comhbhonn agus a réaladh le cúplóirí dathanna.
Comhlacht Kodak a thug isteach an chéad cheann, Kodachrome, i 1935, agus thug Agfa ceann eile isteach i 1939. I 1949 thug Kodak ceann feabhsaithe isteach, Ektacolor, le mascoibreán sna claoneibleachtaí, rud a d'fheabhsaigh cáilíocht na ndathanna go mór sna clónna deireanacha. I dtríphacaí nua-aoiseacha, bíonn dhá nó 3 chumhdach difriúil ar gach ciseal dathíogair, rud a thugann íogaireacht ard le taifeach mín.[1]
Tagairtí
cuir in eagar- ↑ Hussey, Matt (2011). "Grianghrafadóireacht dhaite". Fréamh an Eolais. Coiscéim. p. 333.
| Tá an t-alt seo bunaithe ar ábhar as Fréamh an Eolais, ciclipéid eolaíochta agus teicneolaíochta leis an Ollamh Matthew Hussey, foilsithe ag Coiscéim sa bhliain 2011. Tá comhluadar na Vicipéide go mór faoi chomaoin acu beirt as ucht cead a thabhairt an t-ábhar ón leabhar a roinnt linn go léir. |
| Is síol é an t-alt seo. Cuir leis, chun cuidiú leis an Vicipéid. Má tá alt níos forbartha le fáil i dteanga eile, is féidir leat aistriúchán Gaeilge a dhéanamh. |