An difríocht idir athruithe ar: "The Great Dictator"

[[Scannánaíocht|Scannán]] ón mbliain [[1940]] is ea '''The Great Dictator''', leis an aisteoir grinn mór le rá, [[Charlie Chaplin]]. Bhí Chaplin ina stiúrthóir ar an scannán agus bhí sé sa dá phríomhpháirt aisteoireachta chomh maith. Bhí sé seo ar an gcéad scannán cainte uaidh, chomh maith le bheith ar an scannán is mó rath uaidh. B'aoir nimhneach é ar an [[Faisisteachas|bhFaisisteachas]]. Is díol suntais é an scannán seo, ós rud é nár thuig go leor daoine cé chomh holc is a bhí [[Naitsíochas|na Naitsithe]] ag an am sin, mar nach raibh eolas ag an bpobal faoi na campaí báis. Ach déantar cur síos sonrach ar ghéarleanúint na nGiúdach sa scannán seo.

Cuirtear in aithne muid ar dtús leis an mbearbóir Giúdach gan ainm (Chaplin) agus é ag troid sa [[an Chéad Chogadh Domhanda|Chéad Chogadh Domhanda]] ar son a thíre féin, Tomainia (tír fhicseanach arb ionann í agus [[an Ghearmáin]]). Buailtear é sa cheann ag deireadh an chogaidh agus caitheann sé fad fiche bliain in ospidéal agus a chuimhne caillte aige.

Filleann sé ar a ghairm bheatha ag deireadh na tréimhse sin agus gan tuiscint dá laghad aige ar chás polaitiúil a thíre féin, áit a bhfuil deachtóir darb ainm Adenoid Hynkel (Chaplin arís, agus é ag déanamh aithrise ar [[Adolf Hitler]]) tar éis teacht i réim. Is cuid thábhachtach í den phlota agus den ghreann, go bhfuil an bearbóir Giúdach ina mhacasamhail den deachtóir uafásach seo a bhfuil an ghráin dhearg aige ar na [[Giúdachas|Giúdaigh]].

I 1997, d'fhógair Leabharlann Chomhdháil [[SAM]] an scannán seo a bheith "suntasach go cultúrtha, go stairiúil nó go haeistéiticiúil" agus roghnaíodh é le bheith caomhnaithe i gClárlann Scannán Náisiúnta na Stát Aontaithe.