An difríocht idir athruithe ar: "Raymond Chandler"

Cé gur sna [[Stáit Aontaithe]] a rugadh é, chaith sé blianta a óige i [[Sasana]]. Thréig a athair - [[innealtóir]] a bhí ina alcólach - a theaghlach, agus chuaigh máthair Raymond, bean [[Éire|Éireannach]], ar ais go dtí an [[Ríocht Aontaithe]] in éineacht lena mac. Ba é deartháir na máthar a choinnigh bia agus beatha leo. Ina fhear óg dó d'fhill Raymond go Meiriceá ag iarraidh a áit féin a aimsiú sa saol. Liostáil sé sna saighdiúirí sa [[Chéad Chogadh Domhanda]], agus chaith sé seal ag troid. I ndiaidh an chogaidh, d'fhill sé go [[Los Angeles]], agus rinne sé staidéar ar chuntasóireacht le jab seasta a fháil. Phós sé bean a bhí ocht mbliana déag ní ba sine ná é. Sna [[1930idí]], nuair a chaill sé a jab de dheasca na ndeacrachtaí a bhí aige leis an mbiotáille, thosaigh sé ag scríobh scéalta [[Garrfhicsean|garrfhicsin]] lena chuid a shaothrú. D'éirigh leis an scríbhneoireacht, agus sna 1940idí, fostaíodh ina scriptscríbhneoir i [[Hollywood]] é. Fuair a bhean chéile bás sa bhliain 1954, agus í tinn ar feadh i bhfad roimhe sin.

Ní raibh sé ina dhuine shona riamh. Bhí sé ina dhruncaire, cosúil lena athair roimhe, agus dúlagar intinne ag goilleadh air. Chuaigh na deacrachtaí seo chun olcais i ndiaidh bhás a mhná céile. Bhí sé mór le cúpla bean ina dhiaidh sin, ach ní raibh mórán maithe sna cumainn seo, agus bhí níos mó ná bean amháin ag déanamh gur [[homaighnéasach]] a bhí ann agus é á shéanadh féin.

Scríobh sé cuid mhór scéalta, ach is iad na [[Úrscéal|húrscéalta]] ''The Big Sleep'' agus ''The Long Goodbye'' na cinn ba mhó a thuill clú dó.Is é an locht is mó a fhaightear ar a chuid scéalta nach raibh bua na plotála aige - rinne sé praiseach den phlota go minic - agus ní thaitníonn an stiúir mhadrúil a bhíonn faoi le cách ach an oiread, go háirithe an dóigh a mbíonn sé ag trácht ar mhná agus ar homaighnéasaigh. Ón taobh eile de, tá féith liriciúil ann a chuireann ar a chumas áiteanna agus timpeallacht na n-imeachtaí a chur os comhair an léitheora ar dhóigh bheo bhíogúil.