[[Íomhá:Leaning tower of pisa 2.jpg|deas|250pxupright|thumb|Túr Claonta Pisa]]
Is [[foirgneamh]] san [[An Iodáil|Iodáil]] é '''Túr Claonta Pisa'''. Clogás marmair i b[[Pisa]] [[An Iodáil|na hIodáile]], 54 m in airde, atá ann. Tosaíodh ar an tógáil isa bhliain [[1173]], ach de bhrí gur ar ithir bhog a bhí sé, thosaigh an talamh ag ísliú nuair nach raibh ach 3 urlár tógtha. Níor críochnaíodh go dtí [[1372]] é. Cáil air de bhrí go bhfuil sé ag claonadh ó [[1838]], agus an claonadh ag méadú. Bhí imní ar innealtóirí, saineolaithe agus na milliúin daoine a bhfuil grá acu don túr aisteach álainn céanna go dtitfeadh is go gcaillfí an túr. Dhúntaí do chuairteoirí é cuid mhaith den am ó [[1990]] ar eagla na heagla. Cuireadh 14 saineolaí, saineolaithe idirnáisiúnta cuid acu, i mbun seifteanna a bheartú chun an claonadh a laghdú is an túr a shábháil. Ar dtús bhaineadar triail as [[coincréit]] a chur faoin túr ar an taobh a bhí ag ísliú, ag ceapadh go mbrúfadh sé seo an túr suas ar an taobh sin. Ach thapaigh sé seo an claonadh, agus faoi 1997 bhí an barr 5.2 m amach ón [[ingearán]], agus dúnadh do chuairteoirí go hiomlán é. Faoi dheireadh, bhain siad feidhm as modh eile, bunaithe ar an tuiscint go bhfuil an ithir faoin túr cosúil le meascán de [[Glóthach|ghlóthach]] is cúr-rubar, agus an túr mar a bheadh sé ag snámh air. Baineadh ithir go cúramach ón taobh den túr a bhí ag éirí, le feisteas simplí druileála. Timpeall 90 tonna ithreach a baineadh, rud a stop an ráta claonta, a chuir an túr i [[Cothromaíocht|gcothromaíocht]], agus a chuir ag filleadh ar an ingearán é. Ligeadh cuairteoirí ar ais ann i [[2001]].
