Is foirgneamh é Halla na Máisiún (Freemasons' Hall nó Grand Lodge of Ireland) atá lonnaithe ar Shráid Theach Laighean i mBaile Átha Cliath.
Tá stair shaibhir ilghnéitheach ag an bhfoirgneamh agus is é ceanncheathrú na Máisiún in Éirinn é. Bunaíodh an Grand Lodge sa bhliain 1725. Tá an Halla, a tógadh sa bhliain 1869, maisithe i stíl Victeoiriach. Tá síleálacha stuacha gorma i Seomra an Lóiste Mhóir ar a bhfuil ciumhaiseanna bána agus órga agus tá orgán mór píopaí ann. Tá Seomra na dTeamplóirí ann agus seomraí searmanais eile atá maisithe le stíleanna ailtireachta éagsúla, ina measc seomra Éigipteach agus seomra Gotach bréige. Tá seomraí cruinnithe eile ann, a maisíodh i stíleanna Clasaiceacha agus Túdaracha. Tá oifigí riaracháin, leabharlann, músaem agus caifé sa Lóiste freisin.
