Mitraillette

Is ionann mitraillette (ón bhFraincis: [mitʁajɛt], i., "fo-mheaisínghunna" ) agus ceapaire ó bhunús na Beilge. Deanta as leath-bhaguette atá líonta le feoil, sceallóga prátaí, agus rogha anlainn, ithtear mitraillettes agus iad te. Ceann de na ceapairí is coitianta i siopaí sceallóga sa Bhruiséil iad.

Mitraillette

Bunús
Ainmnithe in ómós	fo-mheaisínghunna
Tír dhúchais	an Bheilg
Cuid de	bia na Bruiséile
Sonraí
Cineál	ceapaire, mias phrátaí agus mearbhia
Príomh-chomhábhair	baguette, sceallóga, feoil, anlann agus crudités

Dhá mhitraillettes le hanlainn "riche" agus "brésil". Liège, An Bheilg.

Ceaptar gur tháinig an mhitraillette ar an bhfód don chéad uair sa Bhruiséil, agus tá cáil orthu i bhFlóndras, sa Vallúin agus i dTuaisceart na Fraince chomh maith, ach tugtar "Sandwich Américain" ar an gcineál cheapaire seo sa Fhrainc.

Comhdhéanamh

Cuirtear an mhitraillette thraidisiúnta le chéile leis na nithe seo a leanas ann:

• Leath-bhaguette
• Feoil bhogthe (nó uaireanta feoil fhuar)
• Sceallóga
• Anlann

Is féidir sailéad a fháil sa mhitraillette chomh maith, mar shampla leitis, trátaí, nó oinniúin fhriochta.

Clúdaítear an ceapaire i bpáipéar bán agus ithtear ar an láthair é, nó faightear iad "à emporter" .i., chun tabhairt leat.

Anlainn

Tá rogha fairsing d'anlainn ar fáil sna siopaí sceallóga ar fud na Beilge agus is féidir aon cheann de na hanlainn a chur ar an mitraillette, ag brath ar rogha an chustaiméra. De ghnáth, cuirtear an t-anlann díreach ar an arán agus faoi na sceallóga. Uaireanta, ní chuirtear an t-anlann ar an mitraillette í fhéin ach i bpota beag plaisteach a ghabhann leis.

An mhitraillette i gcultúr an phobail sa Bheilg

I ndiaidh na n-ionsaithe sceimhleithoireachta a tharla sa Bhruiséil ar an 22 Márta 2016, scaipeadh iomhánna de mhitrailllettes ar na meán shóisialta sa Bheilg agus thar lear, chun sceon na ndaoine a laghdú trí ghreann agus chun dlúthphartaíocht a léiriú.