Alexander Alekhine
Imreoir fichille Rúiseach (agus níos déanaí Francach) ab ea Alexander Aleksandrovich Alekhine (31 Deireadh Fómhair [19 Deireadh Fómhair de réir an féilire Iúil] 1892 – 24 Márta 1946) a bhí ina cheathrú churadh domhanda (1927-1935 agus 1937-1946). Faoi 22 bliain d'aois, bhí Alekhine i measc na n-imreoirí fichille is láidre ar domhan cheana féin. I rith na 1920idí, bhuaigh sé an chuid is mó de na comórtais inar imir sé. I 1922 bhuaigh sé an chéad chraobh fichille de chuid an APSS (mar a thugadh air go haisghníomhach) ach d'fhág sé an tAontas Sóivéadach i 1921 agus chuaigh sé ar imirce go dtí an Fhrainc, tír a ndearna sé ionadaíocht air tar éis 1925. Sa bhliain 1927, bhuaigh sé an Chraobh Dhomhanda Fichille i gcluiche in aghaidh José Raúl Capablanca.
Go luath sna 1930idí, bhí an lámh in uachtar ag Alekhine i gcomórtais éagsúla, agus d'imir sé ar an gcéad chlár don Fhrainc i gcúig Oilimpiad fichille, agus bhuaigh sé duaiseanna aonair i ngach ceann. Thairg Alekhine athimirt do Capablanca ar na diantéarmaí céanna a leag Capablanca dó, agus chuaigh an idirbheartaíocht ar aghaidh ar feadh na mblianta gan mórán dul chun cinn a dhéanamh. Idir an dá linn chosain sé a theideal gan stró ar Efim Bogoljubov i 1929 agus 1934. Chaill sé a theideal ar Max Euwe i 1935 ach fuair sé ar ais é in athimirt 1937. As sin amach, bhí sé faoi bhaol ó na réaltaí óga ag teacht chun cinn cosúil le Paul Keres, Reuben Fine, agus Mikhail Botvinnik, ach cuireadh stop leis an idirbheartaíocht maidir le cluiche dá teidil le Keres nó Botvinnik mar gheall ar an Dara Cogadh Domhanda i 1939. Bhí cluiche le Botvinnik don craobh domhanda á socrú i 1946 nuair a fuair Alekhine bás sa Phortaingéil faoi chúinsí amhrasacha. Tá sé curtha ina leith gur chomhoibrigh sé leis na Naitsithe agus as bolscaireacht frith-Sheimíteach a scríobh.[1] Is é Alekhine an t-aon Churadh Domhanda a fuair bás agus an teideal fós ina sheilbh.
Tagairtí
cuir in eagar- ↑ "Was Alekhine a Nazi? by Edward Winter". www.chesshistory.com. Dáta rochtana: 2023-07-16.